VICTORE, MARINO, PERPETUA, JULIA, et aliis LXXIV, itemque HONORATO, URBANO, HILARO, PRIVATULA et aliis xxxiv.
Gloriosos hos pugiles in duas classes distributos ita recenset vetus Romanum MS. sive S. Hieronymi Martyrol. In Africa, Victoris, Marini, Perpetuæ, Juliæ et aliorum LXXIV. Et Hierosolymis, S. Simeonis. In Africa, Honorati, Orbani, Hilari, Privatulæ et aliorum xxxiv. Cum eorum Actis destituamur, ea solum proferemus, quæ in aliis extant Martyrologiis. MS. Martyrol. Ecclesiæ S. Mariæ Ultrajecti: In Africa Victoris, et aliorum LXXX. Carthusiani Colonien. in addit. ad Usuardum, duas quoque classes constituunt, sed aliter atque vetus illud Martyrol. In Africa, sanctorum Martyrum Victoris et aliorum LXXX. Item SS. Marini, Perpetuæ, Juliæ, Privatulæ.
2 Conflat in unum cuneum, omninoque permiscet Notkerus: In Africa, Victoris, Maurini, Honorati, Orbani, Hilarii, Perpetui, Juliani, Privatulæ, et aliorum LXXIV. Et MS. Pragense, ne indicato quidem loco certaminis: Maurini, Honorati, Urbani, Perpetuæ, Julianæ, Privatulæ, et aliorum xxiii. MS. S. Mariæ ad Gradus, Coloniæ: In Africa, S. Honorati, Proniani, et aliorum xxiv. Verum Pronianus, Apronianus est, via Salaria cæsus, de quo mox. MS. Martyrol. Ecclesiæ S. Mariæ Aquisgrani: Natalis Victoris, Marini, Perpetuæ, Juliæ. Et depositio S. Laurentii Ep. Primiatulæ. MS. Richenoviense: Africa, Marini, Perpetuæ, Privatulæ, Honorati.
3 Nec plura de iis reperimus. Notanda vero etiam nominum varietas est. Nam qui ceteris Marinus, Martyrologio Pragen. et Notkero Maurinus est: Perpetua, eidem Notkero Perpetuus: Julia, eidem Julianus. MS. Prag. Juliana: Urbanus, MS. S. Hieron. Orbanus: Hilarus, Notkero Hilarius, nisi id ab Henr. Canisio sit, qui Notkerum edidit: Privatula denique, in MS. Aquisgran. Primatula est.
✠
Izvornik: Acta Sanctorum. Februarius, tomus I, Pariz: Victor Palmé, 1863. Prvi cjeloviti prijevod na hrvatski, objavljen 23. studenoga 2026. Prijevod i uređivanje: Tim Kršćanska stvarnost.