Preskoči na sadržaj
Kršćanska Stvarnost

✠

Acta Sanctorum · Svezak IV · Svezak IV

Acta Sanctorum za veljaču

ACTA SANCTORUM FEBRUARII

FEBRUARIUS MENSIS, gelu licet nivibusque horridus, haud tamen ita corpora hominum mentesque adstringit et torpedine glaciat, ut non quandoque magnificas, contempta vi frigorum, res gerant, ac memoriam gestarum perennibus publici plausus consecrent argumentis. Evenere sane quidem, hoc mense, veteri Romæ multa, ad quorum recordationem sacra ac ludos, solenni posterorum gratulatione celebrandos, indixit. Ita (quod Polemeus Silvius in Laterculo, Posthumiani et Zenonis consulatu, anno nimirum ccccxlviii Æræ vulgaris, conscripto, annotavit) xiii Kalend. Martias, Romulus occisus a suis non apparuisse confictus est: vii Kalend. Regifugium accidit, cum Tarquinius Superbus ab Urbe expulsus: Idibus, Parentatio tumulorum; quo die Roma liberata est obsidione Gallorum: ac denique ad III Kalendas, in beatæ spem dominationis, natus est Constantinus.

Neque Christiana Roma, et qui ejus nutum sanctius quam antiquæ observat orbis subjectus, aut mysteria desiderat hoc peracta mense, quæ æterna devotione veneretur; aut Sanctorum omnis ætatis, quæ imiletur, ad singulos dies consignata decora. Nam iv Nonas Hypapante recolitur, sive Occursus, deportati ad templum Hierosolymitanum JESU Salvatoris: ejusque Matris Sanctissimæ Purificatio; a qua religiosius fieri instaurarive Februario nomen fas est, (nam Februm, sive Februum, veteres purgamentum dixerunt) quam ab mœnium Romanorum profana lustratione. Quid, quod Christo Regi exhibita a Magis Adoratio (quam Græci xxv Decembris, una cum ejus Nativitate celebrant; Latini vii Idus Januarii, quo die, triginta post annis, a Joanne est baptizatus) hoc mense contigit? Qui enim alioqui credibile sit, Divino monitu, nocte intempesta, summo silentio, devio itinere, abiisse Magos, et in spelunca, quam deinde S. Theodosius Cænobiarcha (ut x1 Januarii dictum) inhabitav it, ad modicam quietem latuisse; si dein xxxv dies secure Bethlehemi Deipara Mater substitit, ac demum Hierosolymam venit, Filiumque, tanta sanctæ exultationis et vaticiniorum celebritate excipiendum, Sacerdotibus stitit? Contigit igitur post hanc Oblationem Adoratio Magorum, et mox imperata tum his tum novo Regi fuga, vereque Christianum Regifugium. Sed hæc Divinarum litterarum interpretibus accuratius pertractanda relinquimus, minus proposito nostro congruentia: quippe qui solum Sanctorum, æterni illius Regis militum, partim tropæa sanguine inscripta, partim monumenta præclaris benefactis aggesta, proferre hic constituerimus.

Tu, cujus Gratia cæpta ulraque et consummata sunt, CHRISTE JESU, Spiritu tuo divino nostros promove conatus. Fave Tu quoque, et cursum felicem nobis a Filio impetra MARIA Augusta: quæque, per inhospitam solitudinem, in Ægyptum profugere hoc mense coacta es, ostende quælegamus calamo, moribus exprimamus, Tua, Filii, Sanctorum vestigia.

✠

Izvornik: Acta Sanctorum. Februarius, tomus I, Pariz: Victor Palmé, 1863. Prvi cjeloviti prijevod na hrvatski, objavljen 23. studenoga 2026. Prijevod i uređivanje: Tim Kršćanska stvarnost.

Svezak IV Kalendar godine