Seraphinus Esquirrus Ordinis Capucinorum Theologus, lib. 1 Sanctuarii Calaritani, sive historicæ narrationis inventarum Calari Reliquiarum anno Christi MDCXIV, et aliquot sequentibus, Calari excusæ an. MDCXXIV, testatur, in basilica S. Saturnini (de quo XXX Octobris agemus) juxta urbem Calaritanam, repertam ex albo marmore tabulam, tres palmos longam, duos latam, intra parietem basilicæ inclusam; sub qua arca erat lapidea, quæ sacras Martyris exuvias continebat; tabulæ vero hæc incisa legebatur epigraphe:
HIC IACET B. M. POMPEIANVS QVI VIXIT ANNIS PLVS MINVS XXVI. REQVEVIT IN PACE VI. IANVARII.
Ex signo transfixi cordis colligit Auctor Martyrem fuisse, probatque pluribus in eodem libro exemplis.
2 Franciscus Esquivelius, Archiepiscopus Calaritanus, in Relatione inventarum sacrarum Reliquiarum, missa ad Paulum V, Pontificem Maximum, excusa Neapoli anno MDCXVII, S. Pompeiani quoque meminit.
✠