Tradit Seraphinus Squirrus Sanctuarii Calaritani parte 1, lib. 3, cap. 1, dum subterranea basilica S. Restitutæ mundaretur, terraque egereretur; repertam esse, inter alia isthic conditorum Sanctorum monumenta, tabulam marmoream, magnitudine palmi ac semis; cui hæc insculpta erant verba:
✗ IK IAKET B. M. THE ODORVS OPT. QVI VIXIT AN. PLV MN. XXXXV REQVI EBIT IN PAKE. NO NIS IANVARII IND. IIII. ✗
Observat idem auctor, ut hic Theodoro titulus Optimi tribuitur, ita alibi legi: S. Restitutus fidelis, Sanctus Acajus qui vixit pius et justus; Sanctus Guisitanus Pius. Conjicit vero non solum gente Sardum fuisse, et Calari passum, sed videri eadem, qua S. Restitutam S. Eusebii Vercellensis matrem, tempestati martyrium subiisse. Quæ vero ab antiquo S. Theodori nomine dedicatæ visuntur in Sardinia Ecclesiæ, qui vulgo Santu Teru appellatur, huic ait videri Sancto erectas. Talem extare Barumini oppido nobilissimæ Zapatarum domus, quæ Patribus Capucinis tradita est, ædificato juxta eam a Leonora Zapata et filiis Monasterio. Demum in eadem S. Restitutæ crypta fuisse conditas S. Theodori reliquias, etsi necdum repertæ sint, extra quæstionem ponit idem Seraphinus. De S. Restituta agemus xv Junii.
✠